1Cor 7 | MED | STEP | Akup ila, enim nga mon rok ngurung ni nga, ik mat punt rop nᵾmp ngont. Wu ti, amp ti natᵾm ndam, ei etpa kai mondrum.

1 Corinthians 7

Wu Amp Raⱡ Nga Ik

1 Akup ila, enim nga mon rok ngurung ni nga, ik mat punt rop nᵾmp ngont. Wu ti, amp ti natᵾm ndam, ei etpa kai mondrum. 2 Wote, wu amp wapra uⱡ ei nga minal enmin ei nga, wu mbᵾ pora, elim nga amp mendpᵾⱡ ti muⱡangga mint. Wote amp mbᵾ, i ku etᵾk, en enim nga wu mendpᵾⱡ ti muⱡangga ku. 3 Wu ei ndi moⱡpa, elim nga uⱡ petᵾm mbᵾ mel itangga! Wote, amp ei ndi moⱡpa, elim nga uⱡ petᵾm mbᵾ mel itangga! Ei mel etkᵾⱡ, wamp ti ndi, ti tᵾpa rᵾpᵾndangga muⱡᵾnggil. 4 Ei nga, amp ei nga kᵾng ei, elim nga mendpᵾⱡ mon, wam nga. Wote, ei mel ku, wu ei nga kᵾng ei, elim nga mendpᵾⱡ mon, amp ei nga. 5 Wu amp raⱡ nga ti ndi, ti elim nga kᵾng ei tᵾpa, mbuⱡ ngui ngᵾngangga mon! Atinga ruinggil ui ila mint, en enmbil nᵾkᵾⱡ tenda ndukᵾⱡ muⱡᵾl! Wote, enmbil wu amp nga rup rui uⱡ ila, ruk okᵾⱡ rak ndukᵾⱡ muⱡᵾl! Wote, wu amp rup rui uⱡ ei nga kum ei ndi, enmbil tangga! Seitan ndi, enmbil oⱡa tᵾpa kᵾni nᵾkᵾnangga mon! 6 Ik nᵾnt kᵾⱡ, mi rop ni nanᵾnt mon, enim kᵾn waldᵾp tent! 7 Na ndi pᵾnt ei, wamp mbᵾ pora, na mont ei mel moⱡmina ndam, pᵾp. Wote Got ndi, wamp mbᵾ pora uⱡ kai mat elpa elpa iteing nimba, kᵾmp tᵾpa ngurum. Wamp ti kᵾn, uⱡ ti ngumba, ti kᵾn uⱡ elpa ti ku ngurum.

8 Akup ik ti nimp ent ei, amp wu pi napᵾrmin na, wu amp ti natᵾtᵾm na, wote amp wiya na mbᵾ kᵾn, ik ei nᵾmp ngont. Na nanim ent ei mel, enim i ku etᵾk, pek moⱡung ndam, ei kapⱡa. 9 Wote enim pilangina, wu amp rᵾp rui uⱡ ei nga, numan ila imp muⱡin mel mon em ndam, nim amp ei, wu pi, wote wu ei, amp ti ku. Wote tᵾpa kawa ndangga, wamp kandᵾk kum pin ting uⱡ ei, iti nᵾteing.

10 Enim wu amp nᵾk mormin wamp ei nga, ik ronduⱡ ti nimp ent. Na mendpᵾⱡ mon, Nuim ei ndi nᵾnᵾm. Amp ti ndi, elim nga wam wu ei, wak rui nᵾrangga mon! Muna amp ei ndi, elim nga wam wu ei, wak rom ndam, amp ei elim wiya muⱡangga! Wote mon ndam, wam wu ei kᵾn, aldpa rukᵾr pangga mint! Wote, nim wu ti ndi, nim nga amp ei, wak rui nᵾri mon!

12 Wote, wamp kat nga na ndi ik nᵾnt. (Nuim ei nga mi ik ti mon!) Kraist kᵾn mondpa pili wu ti, elim nga amp ei, Kraist kᵾn mondpa pili napilpa, wam wu ei kᵾn, pep muⱡimp nimba moⱡum ndam, wu ei ndi, amp ei wak rui nᵾrangga! 13 Wote, mondpa pili amp ti, elim nga wam wu ei, Kraist kᵾn mondpa pili napilpa, elim kᵾn pep muⱡimp nimba moⱡum ndam, amp ei ndi, wu ei wak rui nᵾrangga! 14 Nim pᵾn ei, wote mbo wu ti, Kraist kᵾn mondpa pili amp ti, tᵾm ndam, Got ndi, wu ei, Got elim nga wamp mel nimba. Wote mbo amp ti, mondpa pili wu ti tᵾm ndam, Got ndi amp ei, elim nga amp mel nimba. Wote, i etkᵾⱡ muⱡi nambᵾⱡanggil ndam, en enmbil nga kangambuⱡa mbᵾ, Got ndi, numan ngui ngᵾngangga mbo wamp mel muⱡing. Wote, ik ei kupa mint. Ei nga, Got ndi, wamp raⱡ nga kangambuⱡa mbᵾ, elim nga wamp rᵾⱡaip mbᵾ mint nimba.

15 Wote, mondpa pili nᵾpili wu ti ndi, mondpa pilim amp ei, wak ruimp nimba pilim ndam, kapⱡa wak rangga ku. Uⱡ ei mel mat pem ndam, nim mondpa pili tekᵾn morᵾn amp ei ndi, uⱡ ei ndi, nim nga mul uⱡ ei, etpa kit mundi namᵾndᵾmba. Nambuⱡ emel, Got ndi, nim numan wang ndui uⱡ mbila, pekᵾn muⱡᵾn nimba wi ropa titim. 16 Nim amp ei, nim nga wanᵾm etkᵾn, mondpa pili wu rundᵾn, muna mon, ei nim pili napilkᵾn morᵾn. Wote, nim wu ei, nim nga ambnᵾm etkᵾn, Kraist kᵾn mondpa pili amp rundᵾn muna mon ei, nim pili napilkᵾn morᵾn.

Got Ndi Enim Wi Ropa Titim Ei Mel Pek Muⱡᵾi

17 Enim wamp mbᵾ pora, Nuim ei ndi, kongun elpa elpa mbᵾ nga iteing nimba, kᵾmp tᵾpa ngurum. Kongun ei, etmin ei mel etᵾk, wote Got ndi, wi ropa tᵾpa, kongun ngurum ila mint, kongun etᵾk mek pᵾi! Na ndi, mi ik atinga manga tetᵾm kona mbila pora, mbo endᵾp nᵾt mel nᵾnt. 18 Kᵾng kupti uⱡ ei nga itim wu ti, Got nga wi rurum uⱡ ei, kapⱡa nimba kum titim ndam, kᵾng nit ei, tᵾpa mundi nᵾmᵾndangga! Wote, kᵾng kupti nᵾpᵾtᵾtᵾm wu ti, Got nga wi ei, kum tepa pilpa kapⱡa nimba, pilim ndam, wote kᵾng kupti uⱡ ei nga iti nᵾtangga! 19 Nambuⱡ emel, kᵾng kupti uⱡ ei nga eng ndam kep, mon muna ndam kep, uⱡ tila ⱡawa pi napᵾrᵾm. Itmin uⱡ mendpᵾⱡ ei, Got nga mi ik ngurum kᵾⱡ mint, teng ndupᵾn, pep rumin ndam, kapⱡa etmba. 20 Wamp pora, enim unt nambuⱡ etᵾk moⱡina, Got ndi, wi ropa titim ei mel ku, akup i ku etᵾk muⱡᵾi! 21 Nim kongun kindmant wamp moⱡina, Got ndi, wi ropa titim ei? Ei mel ndam, numan ou ndupa pili nᵾpili! Wote, wei muⱡᵾn, nombuⱡa mam ti tem ndam, molkᵾn kai mundi! 22 Kongun kindmant wu ti, Nuim ei ndi, wi ropa tᵾm ndam, ei Nuim ei nga mbi ila, wu ei mel ti ndi, imp muⱡi nambrᵾm. Ei mel ku, wamp wei morum ni, Kraist ndi, wi ropa rukᵾr tilinga omba, Kraist nga kongun kindmant wamp morum. 23 Got ndi, mel ou ndupa wak ropa, enim rop ropa titim. Ei nga, pilik kᵾn, wamp nga kongun kindmant wamp muⱡi nᵾmbᵾⱡᵾi! 24 Angmᵾn! Enim unt namba uⱡ mat etᵾk moⱡina, Got ndi, wi ropa rukᵾr titim? Ei mel ku, akup Got kᵾn rup rok muⱡᵾi!

25 Akup ila, amp wendᵾp na, wu kumᵾndᵾp na mbᵾ nga ik mat nimp ent. Nuim ei ndi, mi ik ngumba na neimp nimba ngui ngangᵾm mon. Na nanim nga numan ila nᵾnt. Nuim ei ndi, na kont kurum uⱡ ila enim ndi, na nᵾnt ik ei, kupa nᵾk pilik teing. 26 Akup ui mbila mbun mat penᵾm. Ei nga, na ndi pᵾnt ei, enim kang wamp mbᵾ mormin ei mel muⱡᵾi! Amp tᵾk, wu puk enmin uⱡ ei nga, iti nating ndam, kai etmba. 27 Nim wu ti, amp unt titᵾn muna mon? Amp ti titᵾn ndam, amp ei, wak ruimp nᵾkᵾn uⱡ ti, iti nᵾti! Wote amp ti, nᵾtᵾn wu ti, morᵾn muna mon? Amp ti, nᵾtᵾtᵾn ndam, amp timp nᵾkᵾn kuri nᵾkᵾri! 28 Wote, amp ti tin ndam, nim uⱡ kit ti iti nᵾtᵾn! Wote amp wendᵾp kokila ti, wu pum ndam, amp ei, uⱡ kit ti, iti natᵾmba. Wote amp tᵾk, wu puk eng ndam, ya mᵾi kona ila mbun ou ndupa koma ruing. Uⱡ ei, na ndi pᵾnt ei, enim kᵾn pi nᵾpangga nᵾmp nᵾnt. 29 Angmᵾn, na nᵾnt ik puⱡ ei, ei mel, ui mat ou ndupa pi napᵾtᵾm. Ei nga, amp tᵾtmᵾn wu mbᵾ, amp ti natᵾtmᵾn mel pek muⱡeing. 30 Ka etᵾk mormin wamp mbᵾ, kit pili napᵾtmᵾn wamp mel muⱡᵾi! Enim oi etᵾk mormin mbᵾ, numan kai penim nᵾk muⱡi nᵾmbᵾⱡᵾi! Mel rop rok tᵾtmin wamp mbᵾ pilik, enim tᵾtmin mel mbᵾ, en enim nga tetmin nᵾk, pili napilik muⱡᵾi! 31 Ya mᵾi kona ila mel mbᵾ tᵾpa, kongun etpa moⱡum wamp ei pilkᵾn, mel mbila minal pili nᵾpili! Nambuⱡ emel, mᵾi kona mormin kona ei, ya akup tenim ei mel tepa, ruⱡ pi napᵾmba, mon!

32 Wote, ya mᵾi kona ila mel ti ndi, enim etpa numan mbun ngui ngᵾngangga nᵾmp nᵾnt. Amp ti natᵾtᵾm wu ni ndi, Nuim ei nga kongun ila ou ndupa pitim. Nambuⱡ emel, Nuim ei etᵾp, numan kai pindimp nimba etᵾm. 33 Wote, amp titim wu ni, elim nga ambᵾm etᵾp numan kai pindimp nimba, mᵾi kona ila uⱡ mbᵾ nga minal pᵾtᵾm. 34 Ei mel elinga, elim nga numan ei paⱡpa raⱡ etᵾm. Wote, wu pi napᵾrᵾm amp wendᵾp ei, Nuim ei nga kongun ila minal pᵾtᵾm. Ei nambuⱡ emel, elim nga kᵾng ei kᵾn, min ei kᵾn, Nuim ei kᵾn ngumba ruk ndupa, kai muⱡimp nimba etᵾm. Wote, wu purum amp ei, mᵾi kona uⱡ mbᵾ nga minal pᵾtᵾm. Ei nambuⱡ emel, wam etᵾp numan kai pindimp nimba etᵾm. 35 Na ik nᵾnt mbᵾ, enim nga orunga molk, kai mundeing nᵾmp kᵾn nᵾnt. Enim uⱡ nᵾnt mbᵾ nga mi rop ik, ti ni nanᵾnt. Wote, enim uⱡ kun mbᵾ nga iteing nᵾmp nᵾnt. Wote, Nuim ei nga kongun ila numan raⱡ pindi napᵾndᵾk, kᵾmp kᵾm ruk puk molk, kongun iteing nᵾmp pilip nᵾnt. 36 Wote, kang wu ti, elim nga amp ti tangga nᵾk, ol ik nᵾndᵾk mondung amp ei kᵾn, kandpa kum pindi numan mat pilpa, uⱡ minᵾpi mat em ndam, numan minal ngumba amp ei tangga! Uⱡ ei nga, ⱡawa ti mon. 37 Wote wamp ti ndi, ni nᵾnangga, wu ti elim nga numan ila ronduⱡ mundpa, amp ti nᵾtimp nimba, elim nga nim ik ila ronduⱡ mbᵾ muⱡimp nimba, elim nga amp ol ik nᵾndᵾk, mondung ei, nuwa moⱡangga nim ndam, ei kapⱡa ku. 38 Ei nga, wu ti ndi, elim nga amp ol ik nᵾndᵾk, mondrung ei tᵾm ndam, uⱡ kai ei ku etmba. Wote wu ti, elim nga amp ei, ti nᵾtimp nim ndam, ei ama minal, etpa kai mondᵾmba.

39 Wu pi amp ti, elim nga wam ei, kont moⱡum ndam, amp ei, wam nga mbi ila kunda mormbil mint. Wote, wam koⱡum ndam, wu ei kᵾn mbi morum uⱡ ei, mana pangga, elim nga numan ila, wu kont nga kapⱡa mba mint. Wote, wu ekit orunga ti mon. Kraist kᵾn mondpa pᵾtᵾm wu ti mint pangga! 40 Na nga numan ila pᵾnt ei, amp ei elim wiya moⱡum ndam, kai pilpa moⱡmba. Got nga Muⱡnga ei, na kᵾn moⱡnga nᵾnt nᵾmp pᵾnt.